JORNADA DE IGUALDADE

Famílias e educadoras da Semente Vigo assitimos esta semana a umha jornada de igualdade impartida por Cristina Rodríguez Ramos. Obrigadas por contribuíres desinteressadamente a melhorarmos em questons de coeducaçom.

ABERTA PRÉ-INSCRIÇOM 2020-2021

Mantemos aberto o período de pré-inscriçom para crianças de 2 a 6 anos. Enche a ficha, assina e envia para sementevigo@sementevigo.gal ou deposita-a na caixa dos correios do local, na rua Doutor Corbal, 102.
Também podes escrever para combinares connosco e vires conhecer o nosso espaço educativo nos dias de portas abertas que decorrerám aginha como for possível.

AS MERDEIRAS DE RUADA POR TEIS

Ontem foi um grande dia de Entruido no que demos máis vida ao bairro de Teis. A Merdeira Palmira e o Merdeiro Pinto estiverom na Semente a nos explicar a importância desta personagem do Entruido viguês. As peças do fato, o significado, o seu papel na atualidade…


Depois fomos junto com famílias e educadoras de ruada polo bairro acompanhadas da música do gaiteiro Jandro e a pandereteira Margot.


Sobressaltamos as pessoas do mercado, das lojas e dos estabelecimentos com grande ledícia. Também houvo quem nom entendeu que estamos de festa. Mesmo saímos no canal da televisom local. Como feche partilhamos uns petiscos na Semente com as participantes e as vizinhas.
Entruido nom é Carnaval!

A PANTALHA

A nossa colega Belén é de Ginzo de Límia e contou-nos que ontem foi Domingo Corredoiro e as Pantalhas saírom à rúa. Trouxo um traje e umha carauta para crianças que puidemos experimentar.
Depois apareceu a Jéssica, completamente enfeitada com a capa, as polainas, a máscara, o cinto com as campaínhas e os ajôujeres, a faixa e as bexigas para nos amossar que as mulheres também som Pantalhas.
Que viva o Entruido!

ENTRUIDO

A Semente Vigo participou no sábado na Merdeirada Cativa que organiza a Associaçom Etnográfica A Merdeira em colaboraçom com a Associaçom Cultural e Vizinhal Casco Velho. Começa o Entruido!

O vindouro dia 21 as merdeirinhas da Semente Vigo percorrerám o bairro de Teis a partir das 12:00 horas. Aguardamos por vós!

PASSEIO POLO BAIRRO

Estamos na época da Candelária e aproveitamos o bom tempo para sairmos polo bairro observar os passarinhos.


Conseguimos ver rolas, gaivotas, garças, melros, piscos… Vimos um ninho pequeno numha árvore da praia da Ponta. Também alertamos ao 012 dumha colmeia de vespa velutina via telefone para que a venham levar aginha.


Ao voltarmos à Semente, umha vizinha com a que nunca tínhamos falado, convidou-nos à casa dela, deu-nos um pacote de bolachas e contemplamos a ria desde o seu terraço. Muito obrigadas Elisa!

O COLO DAS PALAVRAS

Na sexta-feira, 7 de fevereiro, às 19:00 terá lugar na livraria Cartabón a  Apresentaçom do livro-cd ‘O colo das palavras. Umha grainha de Semente’. Intervirá Antón Cortizas e contaremos com a música de Cé Orquestra Pantasma e Servando Barreiro. Contamos contigo!

Vídeo da apresentaçom:

JORNADAS FORMATIVAS NO PARAIXAL

O CEIP Paraixal de Teis organiza umhas novas Jornadas Formativas intituladas transformações das relações e cuidados nas comunidades educativas. Decorrerám os dias 25 de janeiro e 1 e 8 de fevereiro com a participaçom de Mari Fidalgo, María Rosendo e Mar Cendón. Máis informaçom em xornadasparaixal@gmail.com e no número de telefone 609 652 368.

UMHA NOVA SEMENTE EM VIGO?

No 2019 a Semente Vigo continuou a medrar graças a todas as pessoas sócias e colaboradoras que confiades cada dia no projeto. Temos a ledícia de comunicar que para o 2020 tencionamos abrir um segundo local na cidade e isso só é possível porque podemos contar con todas vós. Ficamos muito obrigadas por tornardes real um presente e um futuro em galego para as crianças. Por um 2020 carregado de prosperidade para a nossa terra!

E como os começos som difíceis, deixamos cá a ligaçom da ficha de sócias da Semente da Crunha (na foto) que precisa alargar a sua base associativa para continuar com o projeto. Também podedes tornar-vos sócias da Semente Vigo nesta mesma web.

Medre a Semente!

ASSEMBLEIA GERAL

A Junta Diretiva da associaçom Pró-Escola Semente Vigo convoca todas as sócias e sócios à assembleia geral que decorrerá o sábado 14 às nove no Local Social Faísca, em Rio Mau de Riba (Rua Toledo, 9).

FESTIVAL DA SEMENTE

Este domingo às 18:00 decorrerá no Auditório de Narom a quinta ediçom  do Festival da Semente. Circo e música levarám o protagonismo do espetáculo apresentado pola palhaça Natalia Otero.

A entrada é de balde até os dous anos, de 3€ para crianças de entre tres e doze anos e 8€ a partir dos doze anos.